اتعودت دايما اختار الصوره قبل حتى ما فكر انا عايزه اكتب ايه...يمكن لأني دايما بحس ان الصوره بتقول
حاجات اكتر بكتير من اللي ممكن يقوله اي انسان
ومخبيش عليكوا بالرغم من اكتئابي الشديد الايام دي الا ان الصوره دي لما شفتها حسيت براحه عجيبه
ومن ساعة ما شفتها معرفش ليه سيطرت عليا الفكره دي
"فن الاستمتاع بالحياه"
وانا قاعده مع نفسي اليومين اللي فاتوا وعاتيه لنفسي اجازه من الدنيا لقيت ان تقريبا تسعين ف الميه من الناس
اللي حواليا عندهم اكتئاب وقرفانين ومستنيين حاجه تحصل تخرجهم من اللي هما فيه
ولو سألت اي حد فيهم ايه الحاجه دي؟ هيقولك معرفش
طيب هنفضل نستنى لحد امتى
افرض الحاجه دي محصلتش اصلا؟ او حصلت بس بعد فوات الاوان
هنكون استفادنا ايه من انتظارها؟
بصراحه من وقتها لقيت نفسي بفكر بشكل مختلف تماما
ولقيتني لأول مره ولا اراديا بتعلم النوع ده من الفن
فن الاستمتاع بالحياه
وعلى رأي مذيعه مش فاكره اسمها
فاصل ...ونواصل
28 comments:
تمام أوي عيشي حياتك واستمتعي بيها قبل عكننة الجواز :)
صح قد لا نعيش السعادة كاملة ولكن على الأقل نكون في حالة حياد لا حزن ولا فرح وهي أفضل من الاكتئاب كذلك الانتظار يطيل الوقت فالأولى أن نشغل أنفسنا حتى يصل قدرنا بالسعادة سريعاً ولو أني أعرف ما يسعدني تحديداً ولكني مللت الانتظار لذا مضيت أتجول في طرقات الحياة حتى يحين موعد السعادة
ملحوظة نعم الصورة جميلة ونعم عين الكاميرا ترصد مواقف قد تغيب عن عين الانسان
الحمد لله بوست جديد اخير
عارفه انا اوقات بفكر كده وانى انا اللى لازم اسعى للحاجه اللى هتخلينى سعيده
بس بصراحه غالبا بفشل
مازلت انتظر؟
بس المره دى
عملت خطة بديلة
هههههههه
اه ومهو لازم الواحد يكون اتعلم من اللى فات
يعنى مش افضل استنى وبعد كده لما الحاجه دى مش تيجى الدنيا تنتهى
عليكى بالبدائل اللى كلها اسوأ من بعضها
هههههههههههههههه
عارفه مبقتش تفرق كتير
ايه ده انا مين ؟ مي جابنى هنا؟ انتى مين؟
شكل دماغى ضربت متخديش فى بالك
واستمتعى بحياتك محدش واخد منها حاجه على الله تولع
مستنى نواصل
لانى بجد محتاج الدوا ده جدا
فن الاستمتاع بالحياه
العنوان جذاب وفى التسويق للفكره هيبقى جنان
الصوره حلوه قوى
المرض منتشر جدا
الاحتياج للدوا على ودنه
بجد ياريت تبقى سلسله مقالات بالصور الرقيقه الملهمه دى
يلا بقه فرحينا ببوستات متفائله شويه
زهقنا من الغم والنكد والندم والكآبه
مستنى نواصل بقه
سلام
السلام عليكم
الصوره ده ساحره بجد ونادره جدا
انتى عارفها ن الطير عامل وش مبتسم
البق هو الطير اللى فارد جناحاته
والعنين مبقلله كدا وفرحانه ومنشكه فى الطيرين اللى فوق
والسحاب اللى حواليه ممسوحج بأستيكه هايله بأبيض سنه
وش جميل وصوره أجمل
شكرا عليها
الصوره بجد ملهمه
ومستنى بقيه الحمله
فن الاستمتاع بالحياه
سلام
l.g
اتفق معكي لا توجد سعاده كامله وانما بأيدينا ان نمنح انفسنا قدر منها حتى لا نمل الانتظار ونجد العمر ولى دون ان نشعر ولو بقدر ضئيل من استمتاعنا بهذي الحياه
شكرا على تكرار زيارتك للمدونه
ra7eel
رحيل هيست يا جماعه ههههههههههه
تصدقي طول منا بكتب البوست ده قاعده افكر فيكي وانتي بتقوليلي وبعدييييييييييين؟؟؟؟؟؟
هههههههههههههههههه
والله انا بخاف من البدائل بتاعتك دي عيشي حياتك واستمتعي على رأيك محدش واخد منها حاجه
احمد منتصر
مش عارفه الكومنت اللي ردتها على تعليقك راحة فين
ما علينا نقول تاني
بأه احنا نبأه بنتكلم عن فن الاستمتاع بالحياه وانت تجيبلي سيرة الجواز:)
لا احنا كده كويسين هنجيب لنفسنا العكننه ليه
s@gi l'ombre
اليوزر ده انجليزي ولا فرنساوي اصل لو انجليزي شكلي هيبأه وحش اوي:) ياريت الترجمه
شكرا على التشجيع والتعليق الجميل ده واوعدك هكمل بعد الفاصل ان شاء الله
الصوره فعلا حلوه اوي اكيد مفيش اجمل من ابتسامة الطبيعه
صح و الله...ما دا اللى بقوله من زمان....ان احنا بنعيش حياة واحدة بس لازم تكون اجمل حياة ممكنة..و فى كل حاجة فى الدنيا احنا قادريين نطلع الحلو اللى فيها
بوست جميلة و صورة جامدة
السلام عليكم
الصوره بجد رااائعه
وانا زيك بردو وبحس ان ليه نظره مختلفه للصور اللى بشوفها وبفسرها باسلوب مختلف عن غيري
وبتعجبنى حاجات ممكن متعجبش غيري
اختى انا مبسوطه انى عرفت مدونتك...وان شاء الرحمن ازورها دائما
DayDreaming
فن التمتمع بالحياه؟؟؟
نعف ايه احنا عن الحياه علشان نتمتع بيها
على كده ما سمعتيش عن فن تمتع الدنيا بتعذيب الغير
وعن فن تجاهل الدنيا للاخرين
انا مش بعقدتك انا بس بوضح
ان رغم حالات ااكتئاب الجماعى اللى موجوده
صعب اوى تلاقى المكتئب والحزين اللى يستاهل اننا نزعل علشانه
كتير اوى مشاكل الحب
الهجر
القسوه
التجاهل
كتير اوى المشاكل البسيطه اللى بسرعه بيفوق منها الانسان
اتمنالك كل خير
واتمنى انك تتمتعى بالحياه
رغم انها اول زياره ليا بس اكيد هقررها علشان اطمن على اخبار الفن ده معاك
طبعا لو سمحتى لينا
dina
كويس اني لاقيت حد متفق في الرأي
شكرا على زيارتك الجميله للمدونهواتمنى تكرر
حطم القيود
ساعات الصوره بتكون ابلغ من اي كلمه ممكن تتقال وعلى فكره الصوره اللي انتي حطاها معبره اوي عن اسم المدونه
نورتي المدونه ويسعدني تكرار زيارتك
samo
اولا شكرا لزيارتك وتعليقك
ثانيا
ربنا اللي عالم اني كتبت البوست ده في اشد ايام حياتي قسوه ومراره وبعد ما تحطم فعلا حلم حياتي ادام عيني
يعني انا مكتبتوش عشان مستمتعه بحياتي اوي وشايفه اللي حواليا مكتئبين
لا انا كتبته عشان اخرج نفسي من دايره مقفوله ملهاش نهايه
كلنا بنمر بالمشاكل اللي حضرتك اتكلمت عنها واكتر منها كمان بس ايه اللي في ايدينا نعمله
نزعل
ونكتئب
ونفضل نقول ليه يا دنيا عملتي فينا كده؟
هو ده الحل؟
على ما نفوق هنلاقي حزننا معملش حاجه
في حقيقه واحده لازم نقتنع بيها
"قدر الله وما شاء فعل"
والرضا هي اكبر نعمه منحها ربنا للانسان لو رضينا باللي ربنا قسمهلنا هنكون فعلا اسعد الناس
اختلاف الرأي لا يفسدد للود قضيه
اتمنى تكرر زيارتك للمدونه
على فكره انا حاولت اعلق في المدونه عندك بس مش نافع مش عارفه ليه الموضوع ده بيكرر مع كام مدونه ياريت لو حد يعرف السبب يقولي
حقيقي الصوره جميله
مش عارف الطيور دي بتضحك علينا ولا بتضحك للدنيا
ايان كان
احنا كمان هاندور وسط الابتسامه على عكننه
الناس مش عاوزه من الدنيا اكتر من راحة البال و النجاح
او غالبا النجاح في الوصول لراحة البال
كتير فعلا عندهم اكتئاب
لان كل واحد عارف انه يقدر ينجح ويدي الدنيا اكتر من مجرد انه قاعد حاطط ايده على خده مستنى معجزه تحصل
بجد احنا مظلومين
محبوسين في مربع من الزجاج
وشايفين النجاح بس مش عارفين نوصل ليه
امته بقه المربه دا يتكسر
ونخرج
وننطلق
ونطير ونعمل باجنحتنا شكل وش مبتسم
ومش مهم هوه بيضحك للدنيا ولا بضحك على نفسه
المهم انه مبتسم
تحياتي
جامد اوىىى
انك عرفتى فن الاستمتاع بالحياه
فانا والحمدلله اتقنه
وف عز الالام الدنيا كلها
بعرف ازاى اكون فرحانه
تحياتى ليكى
علي فكرة الصورة احيانا كتير بتكون هي الحافز لكتابة موضوع ما وهي اللي بتخلق افكار كتيرة للكتابة والصورة بجد جميلة جدا واختيارها متميز جدا خاصة مع اللموضوع اللي كله امل وتفاؤل "فن الاستمتاع بالحياة" واللي انا باحترمه جدا وهو مش محتاج اكتر من الانسان يكون بسيط وياخد الحياة ببساطة لان الحياة نفسها ابسط كتير ما احنا بنتخيلها
أحييكي علي الموضوع
متفقة معاكى تمام فى حجتين ان الصور هى الى ممكن تلهمنا الكتابه بشكل عام او اى موضوع او حتى خاطرة
ثانيا فن الاستمتاع بالحياه
انا بردة مريت بنفس حالتك
بقيت استهوى انى انزل امشى تحت المطرة او انى اشوف الغروب و الشروق
اوقات بحس فيها قد ايه الدنيا جميله قوى قوى سبجان الله
تحياتى
لازم نحلم بس الحلم هيجى فى يوم ويقولى فوق انت بقالك كتير راكب اصحى وانزل المحطه قربت ولازم نصحى ؟
سامح
احنا اللي مبنحاولش نكسر المربع الزجاجي بنكتفي بأننا ندور جواه لكن اكتر من كده بنعملش احنا صحيح مظلومين لكن جزء من الظلم ده احنا اللي ظالمينه لنفسنا
د/اجدع بنوته
يارب كل الناس تتقنه على الاقل عشان يقدروا يعيشوا في الدنيا اللي مشاكلها كتير اوي دي
سنووايت
معاكي حق في موضوع البساطه ده والله ما في اجمل منها شرفني زيارتك للمدونه
rania
اتمنى تستمتعي بكل لحظه في حياتك مش بلحظات معينه فيها نورتي المدونه
صوت من مصر
كفايه اننا مقضيناش اوقات الحلم في اكتئاب حلمنا واستمتعنا بحلمنا حتى لو مقدرناش نحققه
whispers just for a night
مش عارفه اشكرك ازاي كنت لسه حالا بدور على بنر زي ده
بس عندي مشكله في المدونه مش عارفه اضيف لها اي حاجه جديده مش عارفه ليه
معرفش الصورة مش ظاهرة عندي ليه !!!
bongo
كان في مشكله في الصوره وتم رفعها مره تانيه
شكرا لمرورك
السلام عليكم
للأسف الشديد في الزمن دا والبلد دي علشان الواحد يستمتع بأوقات من حياته لازم يتعود إنه يفصل نفسه عن الحياه والأحداث اللي بتحصل حواليه لفترة الإستمتاع وبعدين يرجع تاني
ودي مسأله صعبه في أغلب الأحيان
أتمنى لكِ التوفيق
خالص تحياتي
"اعمل لدنياك كانك تعيش ابدا واعمل لاخرتك كانك تموت غدا"
علاء سالم
اختلف معك قليلا فلا ارى ضرورة الانفصال عن المجتمع لتحقيق الاستمتاع بالحياه وقد يكون في البوست القادم تأكيد لما اراه
موناليزا
سعدت بزيارتك الكريمه وسعدت اكتر بزيارتي لمدونتك
Post a Comment