مس ! ممكن استريح شويه؟
لا مش ممكن عشان فاضل ربع ساعه بس يادوب نخلص
طيب ممكن اكل شيكولاته وانا بحل؟-
امممممممممممم ممكن
مس ممكن اسألك سؤال؟
مش وقت رغي خاااالص خلص حل الاول
معلش سؤال واحد
اتفضل قول
انا عايز اسأل يعني هو اللي رسم الصور الوحشه على الرسول عليه الصلاة والسلام هو صاحب مصنع شيكولاتة كندر اصل ماما بطلت تجيبهالي وانا بحبها اوي
ههههههههههههههههههه
لا يا حبيبي مش هو
-خلاص نبطل نشتريها ليه؟
انا هقولك افرض معايا كده ان انت كنت كل فتره بتروح تلعب مع واحد زميلك بلعبه انت بتحبها
وفي يوم جه اخوه الصغير ورسم صوره لواحد شكله يضحك جدا وجه قالك يا سمسم دا باباك هتعمل ايه
هقول لاخوه عشان يضربه
طب افرض اخوه قالك وانا مالي هو حر يرسم اللي هو عايزه
هقول لباباه
باباه قالك كل واحد حر يعمل اللي هو عايزه
هقول لبابايا عشان يضربهم
لو باباك معملش حاجه هتعمل ايه
هبطل اروح عند صاحبي ده تاني ومش هلعب معاه ابدا
ليه؟ ده مش هو اللي رسم الصوره ده اخوه اللي رسمها
بس هو سكتله
بس انت بتحب اللعب اللي عنده
مش مهم هخلي بابا يشتريلي لعب تانيه اجمل من اللي عنده
جميييييييييييل
طيب مش انت قبل كده قولتلي انك بتحب ربنا اوي وبتحب الرسول عليه الصلاة والسلام اوي اكتر من اي حد
اه طبعا
يعني اكتر من بابا
اه طبعا
طيب ليه مش عايز تدافع عنه زي ما دافعت عن باباك؟
هو مش في انواع شيكولاته تانيه كتير ممكن تشتريها غير دي
اه
يبأه بلاش الشيكولاته دي تاني
صح يا مس انا مش هجيبها تاني ابدا
مس
نعم
انا فرحان اوي
ليه عشان فهمت؟
ايوه بس عشان حاجه تانيه كمان
ايه؟
عشان الربع ساعه خلصت من غير ما اكمل الامتحان ده
؟؟؟؟؟؟؟؟؟؟؟؟؟؟؟
ادي اخرة اللي يمشي ورا كلام العيال
آل براءة الاطفال آل
54 comments:
whispers
سعدت جدا بمرورك وسعدت اكتر باستمتاعك
بس انا بجد بستمتع بالمكر ده جدا وبعرف اخليهم يندموا عليه وهخليهم هما يعتزلوه قبل ما يخلوني اعتزل:)
هو مش واضح في البوست ولا ايه
انا مكنتش متخيله ابدا ان الولد بيسأل عشان يضيع الوقت الباقي من الحصه هو عرف يستدرجني للمنطقه اللي متأكد اني هرد عليه فيها
ادام اطفال دلوقتي احنا اللي اطفال
هههههههههههههههه
مش عارف اقولك ايه الواد طلع ناصح قوي
بس متقلقيش
بكره التعليم الهايل في بلدنا هيرجعه للصراط المعتدل ويبقى معتوه ذهنيا هايل
بس بجد بجد اسلوب حلو قوي في توصيل الفكره حتى لطفل صغير
بجد احييكي
سلااااااااااااااااااااام
ههههههههههههههههههههه
اسعدتني بالفعل تدوينتك
سعيد بها حقا
وسعيد بمكر الطفل اكثر
اعجبني ردك عن سبب تسميتها براءة الكبار
ههههههههههههههه
جميل
:)))
عجبني البوست دة أوي
و هم فعلا الأطفال بيعرفوا يوصلوا للي هم عايزينه أحسن مننا ألف مرة :) و بيتضحك علينا يا بنتي
:$
من ناحية تانية..أحييكي جدا على طريقتك في إيصال المعلومة بالبساطة دي.. لو كل الناس عملت كدة و استعملت الإقناع كان حاجات كتير اتغيرت في مجتمعنا فعلا
تحياتي كتير
nooooor
مرورك هو الاجمل
اشكرك
جميل المثل
تحياتى
ههههههههههههه بجد صح والله براءه
انما المقاطعه حلو الحوار بجد مقنع
والدكتورة سعاد صالح كانت بتتكلم على حل تانى امبارح
انه ليه مش بنطبع حاجات عليه كلام بالانجليز على طوابع يعنى احاديث وحاجات من دى علشان الناس دى تفهم
بجد فكرة حلوة بتاعتك
لكى منى خالص التقدير لصبرك على الاطفال على فكرة احنا كده زمايل وعارفة المجهود الذهنى الخارق اللى الاطفال بتحتاجه فربنا يقويكى ويعينك
هههههه الاشخاص كلهم واضحين واللى عاجبنى قوى ان ابو الواد سكت ومعروف طبعا مين ابو الواد
هههههههههههه
ربنا يكون في عونك
بس فعلا اجمل حاجه في مهنتك دي انك بتتعاملي مع ورقة بيضا و بتكتبي فيها افكار صح من الأول
ربنا يكرمك و يجعلها في ميزان حسناتك :)
مدونة جميلة جداا كمان
wanna be a phisician
مرورك هو الاجمل
اشكرك
appy
ساعات بحس ان احنا محتاجين نفهم اللي جوه الاول قبل ما نفهم اللي بره
مش قادره اقولك شيكولاتة كندر دي منتشره اد ايه ويمكن دي اكتر حاجه الناس فعلا مش راضيه تقاطعها زي ما تكون روحهم فيها دا انا لقيت واحد كاتب بوست مخصوص بيقنع الناس فيه ان الشيكولاته دي مش دنماركيه اوي يعني
هههههههههه
سعدت بزيارتك
العزيزه موناليزا
من دواعي الشرف يا فندم ان احنا نكون زمايل
ربنا يعينك ويقويكي انتي كمان
ارجو دوام التواصل
بنت مصريه
شوفوا بأه الناس اللي بتقولني كلام مقولتوش:)
لا من فضلك اوعي تفهميني صح
هههههههههههه
اعتقد انها اول زياره للمدونه واتمنى متكونش الاخيره شرفتينا
bongo
ورقه بيضا ايه الكلام ده كان زمان الوقتي بأو بالالوان الطبيعيه
:)
ربنا يقدرنا بس ونقدر نغرس فيهم اي حاجه صح في وقت مبيدخلش اصلا في دماغهم حاجه صح
شكرا على كلماتك الرقيقه
أنا عندي بنت عمتي الصغيره عايش معاها الموضوع ده كتير
العيال اليومين دول بيعملوا اللي هما عايزينه وبيمشوا اللي في دماغهم
بس تعرفي شقاوه لذيذه
بتخليني أحس أنهم هايكونوا أحسن مننا بكتير
تدوينه جميله جدا
تحياتي
alshared
يارب يكونوا احسن مننا بجد ويقدروا يعملوا حاجه
المصيبه ان ذكاءهم من النوع الشرير او يمكن ده مع مدرسينهم بس مش عارفه:)
اشكر مرورك وتعليقك
الله عليكي بجد والله
إيه الشغل الجامد دا
بجد تدوينه جميله وفكرتها مبتكره
بارك الله فيكي وفي قلمك المبدع
خالص تحياتي
علاء سالم
انت ظهرت :) عقبال بئية الناس المختفيه
شكرا لكلماتك
تدوينة حلوة
mostafarayan
اشكرك
ابدعتى يامس.
بس اية الذكاء دة احنا عمرنا ماكنا اطفال
فعلا بجد براءة الكبار هههههههههههههههههههههه
تمنياتى لكى
عزيزتى جميل جدا البوست ده و اسلوبه بسيط وممتع و من احلى الحاجات اللى قريتها فى الموضوع ده. الأطفال دول بقوا فعلا مش سهل التعامل معاهم عايزين واحده زيك و يا ريت كل ام واب يناقشوا مع اولادهم المقاطعة و اهميتها لان الطفل دلوقت لازم يفهم علشان ينفذ.تقبلى تحياتى لك و لكل اهالى بورسعيد اصل احنا كده بلديات بس انا حاليا خارج مصر
عفراء
انا بيتهيألي احنا مكناش اطفال اصلا:)
gannah
في بعض الاباء والامهات عايزين حد يقنعهم هما الاول بالمقاطعه وبعدين يبأوا يقنعوا ولادهم
اشكر اطرائك على البوست وزيارتك الجميله اللي اتاحتلي زيارة مدونتك
وان شاء الله ترجعي بلدك بالسلامه
ارجو دوام التواصل
أبلة داي دريمنج
أول مرة آجي ازوركم والحقيقة مدونة جميلة وموضوعاتها قيمة جدا
وفعلا التعامل مع الاطفال مش سهل ابدا لان عالمهم مختلف وبيبصوا على المواضيع من زاوية مختلفة تماما
ان شاء هتكون فيه زيارات تانية علشان اكمل بقية المواضيع
موضوع جميل .. و ردك على الطفل اجمل .. انتى بقصتك ديه اثبتيلى ان مش كل المدرسين زى بعض و الدنيا لسه بخير.. و الاطفال ان شاء الله حتفضل بخير طول ما فيه مدرسين ..عندهم امانه فى توصيل المعلومه الصحيحه مش المغلوطه....و بخلاف المقاطعه .. اسبتت الدراسات ان كل الحلويات مثل الشيكولاته و البونبون ... بيخلوا الاطفال hyper
واصلا مافيهاش حاجه مفيده..
walad masry
ان شاء الله متكونش اخر مره
شكرا لزيارتك وشكرا لكلماتك
واحده مفروسه
اسعدني مرورك وخليكي متأكده بعض المدرسين اللي بيسيئوا للمهنه دي شواذ مش هما القاعده
لكن لو احنا شايفين ان في تقصير من معظم المدرسين السبب فيه المنظومه التعليميه في مصر مش المدرس لوحده
اشكر مرورك
http://salafiana.blogspot.com/2008/04/blog-post.html
حملة مقاطعة المنتجات الهولنديه .. هنا أغلب المنتجات الهولنديه شاركونا ولكم الأجر وأنشروها بارك الله فيكم
السلام عليكم
ازيك يا جميل
انا كنت فاكرة ان الولد بيتكلم بجد وعايز يفهم
بس لما ظهرت نيته الحقيقية ضحكت
الاطفال دول مشكلة ملهمش حل فعلا ماتعرفيش بيجيبوا الافكار دى منين علشان يوصلوا للى عايزينه
والاسلوب جميل قوى
:)
اختاه هذة اول زياره
ولن تكون الاخيرع بمشيئة الرحمن
انا مش هعلق
ابني هو اللي هيعلق
وتعليقة كان كلمتين بس
طب ياباب لما انتوا فاهمين كده بتستوردوا منهم اصلا ليه؟؟؟؟؟
الواد ضحك عليكى واكلك ف الكلام ياميس
بس مبدئيا
بجد انتى بالبوست ده اتاكدت
انك تربويه جدا
فهمتى الولد وضربتيلى تشبيه فعلا ولا اروع
ماشاء الله
ربنا يوفقك ياميس مى
ahmedshawky
جار نشرها بقدر المستطاع وجزاك الله خيرا
fatma
شكرا لزيارتك الاولى واتمنى متكونش الاخيره
معلش اطفال بأه ولازم نستحملهم
تقبلي تحياتي
مرمر
وحشااااااااانى بجد
وحشانى مرتين
مره بقما انك بنت عمتى وصاحبتى
ومره بما انك من المدونين اللى بجد مفتقده وجودى بينهم
خلاص كده كفايه عايزه انت بقى
انا عند يارا الوقتى
وعلى فكره انا قريت التدوينات اللى فاتت وقريت البوست ده قبل كده بس فعلا مش بعرف اعلق غير وانا فى البيت
كده وبراحتى
شوفى احنا بجد رغم كل اللى كنا فى واحنا صغيرين وطبعا انتى اكتر واحده عارفه احنا كنا ازاى
بس بجد بجد احنا مكناش اطفااااااال
بموت فى لماضتهم وشقاواتهم اللى بتجننى وتخلينى عندى زهول
بس هقول ايه جيل النت يابنتى
بس ردك فعلا ذكى جدا
خايف من الحقيقه
ياريت تقوله معلش اصل اللي الموضوع في ايديهم معندهمش دين ولا عندهم دم
مش عارفه دي بأه توصلهاله ازاي
اشكر مرورك
د اجدع بنوته
مين مس مي دي؟:)هعديهالك المره دي والمره الجايه كمان:) متشكره اوي على الكلام الجميل الكتير اوي والكبير اوي ده
رحيل
وحشتيني بجد المدونه مفتقداكي يا بنتي شدي حيلك ورجعي النت بأه
كده الواحد يغير البوست بأه اصلي كنت مستنيه تعليقك:)
هههههههههههههههههه
بجد جامد جدااااا
ده حصلك اصلا؟؟
بس زعلت عشان بيستذكى
مشعشان يعرف ايه اللى بيحصل حواليه
بس برضو الحوار فعلا جميل
بصراحه هو لعبها صح وعرف يهرب بالعقل والمنطق والله جيل انترنت صح ده احنا مكناش اطفال فعلا
ممممممم
الصراحه أنا استمتعت بالبوست ده
مش بس عجبني
أولا عشان أنا بحب الأمثله اللي من بعيد اللي بتوصل المعلومة وبتثبتها
وبحيي أسلوبك في الإقناع
ثانيا عشان الواد ده فكرني بنفسي أيام البراءة
دانا كنت بريئة براءة :))
بجد أبدعتي
تههههههههههههههههه
دمك شربات
ههههههههههههه
دمك شربات
مرمر
ليكى عندى تاج عدى خديه
وياريت مش تتخضى منه
والله تاج عسل
تصبحى على خير
shimaa samir
اه حصلي بجد هنعمل ايه بأه اطفال ولازم نستحملهم:)
رئيس جمهورية نفسه
من جهة لعبها صح فهو لعيب
اعتقد يا دوب احنا دلوقتي اطفال
ojg
شكلك كنتي بريئه اوي:)واضح من مدونتك
شكرا لمرورك الجميل وكلماتك الاجمل
مسلمه مصريه
سعدت بزيارتك
وشكرا على المجامله اللطيفه
ra7eel
عسل ايه بس هو صحيح سؤال واحد بس مفعز اقصد مفزع يلا عشان خاطرك هجاوبه بلليل ان شاء الله
Post a Comment